"შეიგნეთ, ხალხო, ეს კანონი გარყვნილების ლეგალიზებას უწყობს ხელს!"

"თუ დეპუტატებმა ამ სიბილწესა და გარყვნილებას უნდა მოაწერონ ხელი, ძალიან გამიჭირდება მათი ლოცვებში მოხსენიება"

"იმ "ლოკომოტივმა", რომელმაც პოლიტიკური ძალები პარლამენტში შეიყვანა, ისინი დაიბარა და თითის ქნევით მიუთითა, რომ ეს კანონი უნდა მიეღოთ."

სიონის საკათედრო ტაძრის მოძღვარი, დეკანოზი მამა დავით ლასურაშვილი იმ სასულიერო პირებს შორისაა, რომლებიც საქართველოს პარლამენტის მიერ ანტიდისკრიმინაციულ კანონპროექტის დამტკიცებას აქტიურად ეწინააღმდეგება. დეკანოზი სხვა სასულიერო პირებთან ერთად პარლამენტის იმ სხდომასაც ესწრებოდა, რომელმაც ხმაურით ჩაიარა. სხდომაზე დეკანოზის განცხადებებს საზოგადოებაში აჟიოტაჟი მოჰყვა. ჩვენი რესპოდენტი სწორედ დეკანოზი დავით ლასურაშვილია. 

- კონკრეტულად რა არის თქვენთვის მიუღებელი ანტიდისკრიმინაციულ კანონპროექტში და რა საფრთხეს ხედავთ მასში?

- ისეთი ტერმინებით, როგორიცაა სექსუალური ორიენტაცია და გენდერი, ხდება ახალი ნორმის შემოტანა და ანტიკონსტიტუციური ტერმინების დამკვიდრება. შეიგნეთ, ხალხო, რომ ეს კანონი გარყვნილების ლეგალიზებას უწყობს ხელს. აბა სხვა ქვეყნებში ნახეთ, მსგავსი კანონის მიღებაზე რა რეაქცია აქვ:. მაგალითად, მოლდავეთში მსგავსი კანონპროექტის დამტკიცების შემდეგ პრეზიდენტი და პარლამენტის რამდენიმე წევრი ანათემას გადასცეს - მათ აღსარება და ზიარება აეკრძალათ. მოლდავეთში ამბობენ, გვეგონა, წითელი კომისრები მოვიშორეთ, მაგრამ ახლა ფულეს სახით ცისფერი კომისრები შემოგვესივნენო. კვიპროსი და საბერძნეთი ევროკავშირის წევრი ამ კანონის გარეშე გახდა, ე.ი. მხოლოდ ჩვენ არ გვაწუხებს ეს საკითხი. აქვე ისიც უნდა აღვნიშნოთ, რომ ეკლესია აღიარებს კანონებს იმ შემთხვევაში, როდესაც ისინი საღვთო რჯულთან წინააღმდეგობაში არ მოდიან.

- როგორ ფიქრობთ, ამ ფონზე არსებობს ეკლესიასა და სახელმწიფოს შორის კონსესუსის მიღწევის შანსი?

- პრემიერმა თქვა, კი ვიცით, რომ ჩვენი პატრიარქი ბრძენია, თუმცა კარგად ვიცით, საით მიდის ჩვენი ქვეყანა, ამიტომაც კანონს აუცილებლად მივიღებთო. წინა ხელისუფლების მსგავსად, არც ეს ხელისფლება ითვალისწინებს უმეტეს შემთხვევაში სასულიერო პირების მოწოდებებს. მხოლოდ სიტყვიერად ადასტურებენ პატრიარქის პატივისცემას, რაც მხოლოდ ჟესტს ჰგავს და რეალობასაა მოკლებული. პარლამენტის სხდომაზე ისეთი შთაბეჭდილება დამრჩა, რომ სასულიერო პირებს მხოლოდ სასაუბრო დროს გვაძლევდნენ, გვისმენდნენ, მაგრამ რჩევებს არ ითვალისწინებენ. "კრება დარჩა მხიარულის" პრინციპით ჩვენი ჩართულობა ამ ე.წ. განხილვაში თავის მოტყუებაა და მეტი არაფერი.

- თქვენ განაცხადეთ, რომ თუ კანონპროექტს ამ სახით დაამტკიცებენ, პირადად თქვენ დეპუტატებს ლოცვებში აღარ მოიხსენიებთ. ამ განცხადებამ დიდი აჟიოტაჟი გამოიწვია...

- დიახ, მე ვთქვი, თუ დეპუტატებმა ამ სიბილწესა და გარყვნილებას უნდა მოაწერონ ხელი, პირადად მე ძალიან გამიჭირდება მათი ლოცვებში მოხსენიება-მეთქი. გულსატკენია, რომ არაერთი გონიერი პარლამენტის წევრი ვერ ახერხებს ხმამაღლა დააფიქსირონ ის პოზიცია, რასაც ეკლესიას აქვს და თავადაც იზიარებენ მას. 

- საინტერესოა, კულუარულად რას ამბობდნენ დეპუტატები ამ კანონზე. თქვენ უთხარით ეკა ბესელიას: "კულუარულად რომ მეუბნები, რა ვქნა, ივანიშვილი და ფულე მიქნევს თითსო, ახლა გამოიჩინე გმირობა და არ გაიტანო კანონი, თორემ მიშას რაც მოუვიდა, არ დაგავიწყდესო". როგორ ფიქრობთ, რა აფერხებს ამ ადამიანებს, რატომ ეშინიათ მათ საკუთარი აზრის ხმამაღლა დაფიქსირება? 

- ბოდიშის მოხდით მოგახსენებთ, რომ რისი თქმის სურვილიც იმ წუთში მქონდა, ის ვთქვი. ეს კულუარული ინფორმაციაა და ყველაფრის ხმამაღლა თქმით საქმე წინ ვერ წავა. ჩვენი ინფორმაციით, ასე იყო. იმ "ლოკომოტივმა", რომელმაც პოლიტიკური ძალები პარლამენტში შეიყვანა, ისინი დაიბარა და თითის ქნევით მიუთითა, რომ ეს კანონი უნდა მიეღოთ. 

- ახლა, როცა ეს კანონი მეორე მოსმენით მიიღეს, ეკლესიის მხრიდან რა რეაქციას უნდა ველოდოთ? სხვათა შორის, სასულიერო პირების მხრიდან ანათემაზე გადაცემის საკითხმაც გაიჟღერა.

- ვერ გეტყვით ამას რა შეიძლება მოჰყვეს. თუმცა, ერთი რამ ფაქტია - ეკლესია გარყვნილების დაკანონების ფაქტს ვერასდროს შეეგუება. ჩვენ ამას ვასწავლით და ვუქადაგებთ მრევლსაც და ერსაც, რომ სექსუალური უმცირესობები უნდა გვებრალებოდეს და თუკი ისინი ეკლესიაში მოსვლას გადაწყვეტენ, სასულიერო პირები გვერდში უნდა დავუდგეთ, რათა ამ ცოდვის ჭაობიდან როგორმე გამოვიდნენ. 

სალომე შიხაშვილი (სპეციალურად საიტისთვის)

http://www.kvirispalitra.ge/

წყარო: www.geworld.ge